Tuarascáil Bhliantúil 2008 - Téacs

Achomhairc chun na hArd-Chúirte

Ó tionscnaíodh an tAcht um SF, tá ceart achomhairc chun na hArd-Chúirte ar phonc dlí ag páirtí in athbhreithniú a rinne m’Oifig, nó ag aon duine eile a ndéanann breith ar athbhreithniú den sórt difear dó nó di. Foráiltear chomh maith leis an Acht Leasaithe um SF 2003 go bhféadfaí achomharc a dhéanamh chun na Cúirte Uachtaraí i gcoinne bhreithiúnas na hArd-Chúirte.  

Tharla lear mór gníomhaíochta ó thaobh na dlíthíochta de le bliain anuas. Thug an Ard-Chúirt breithiúnais ar dhá achomharc a rinneadh i gcoinne bhreitheanna m’Oifige. Seasadh le hachomharc amháin agus rinneadh an ceann eile a dhíbhe. Tugtar achoimre ar an dá achomharc sin i gCaibidil 2 den Tuarascáil seo. 

Éisteadh leis an gcéad achomharc – An tAire Oideachais & Eolaíochta – v- An Coimisinéir Faisnéise: [2008] IEHC 279 – i mí Iúil 2008 a bhain le cúig bhreith chosúla arna n-eisiúint ag m’Oifig i mí na Nollag 2005 agus thug an Ard-Chúirt a breithiúnas i mí Lúnasa 2008. 

Éisteadh leis an dara hachomharc – Feidhmeannacht na Seirbhíse Sláinte - v- An Coimisinéir Faisnéise: [2008] IEHC 298 – i mí Iúil 2008 a bhain le breith a d’eisigh m’Oifig i Márta 2007 agus thug an Ard-Chúirt a breithiúnas i nDeireadh Fómhair 2008.  

Bhíothas ag feitheamh ar bhreithiúnas na hArd-Chúirte ar achomharc ar éisteadh leis ar dhátaí éagsúla sa bhliain 2007 agus 2008 agus ar achomharc ar éisteadh leis i mí na Samhna 2008 tráth a raibh an tuarascáil seo á scríobh. Tá cás amháin a tionscnaíodh i gcoinne breithe ar athbhreithniú SF sa bhliain 2008 fós ag an réamhchéim.  

Cuireadh seacht n-achomharc eile chun na hArd-Chúirte i gcrích sa bhliain 2008 faoi mar seo a leanas: 

  • thángthas ar réiteach ar cheann amháin trí bhíthin ordú cúirte;
  • cuireadh trí cinn faoi bhráid m’Oifige an athuair tar éis comhaontaithe go ndéanfaí iad a bhreithniú as an nua – tarraingíodh siar ceann amháin díobh seo ina dhiaidh sin;
  • tarraingíodh siar péire sular éist an t-achomharcóir leo (comhlacht poiblí sa dá chás);
  • chaith an Chúirt ceann eile amach.

Back to contents